News

15. September 2024

Gester hed iisi ersti Gsamtprob stattgfundä. Aber bereits vor därä Prob simmer im Summer fliessig gsi. D'Sujetteams hend s Gwändli, d'Plagettä und dä Grind guisarbeitet, iisä Major hed iisi niiwä Liäder gschriebä, d'Niiwmitglieder hend sich mit ihrem Insturment vertruit gmacht und alli sind id Summerprobä gangä. Vom Sujethock bis zur Herbstversammlig isch also einiges gangä. Ez startid miär id Probesaison fiir iisi 50-Jahr-Jubiläumsfasnacht. Miär freiid iis bereits sehr.

19. Mai 2024

Am Fritig hemmer iisä Sujethock gha. Zum erstä Mal sind iisi Niiwmitglieder ai debiä gsi und hend derfä abstimmä. Es hed vieli Mottovorschläg gäh und es isch eifrig diskutiärt wordä. Nach dä Wahl vom Motto und dä Bildig vom Sujetteam hemmer de ä chlini Paisä gha. Nachher isch's um s'Repetoire gangä. Welli Liäder wählid miär frisch, welli Liäder spielid miär ab sofort nimmä. Ab sofort mechid sich d'Sujetteams as Uisarbeitä vom Motto und dä Kusi as Arrangiärä vo dä niiwä Liäder.

6. Mai 2024

Am 13. April hemmer iisi GV abghaltä. Nach dä Begriässig hed iisä Präsident dä Michi und iisä Major dä Kusi ihri Jahresbricht vorgläsä. Denn hed dä André dä Kassäbricht vorgstellt. Uf diä GV hend sich zwei Mitglieder fiirä Uistritt entschiedä: dä André und dä Gianluca verlend dä Verein. Im Vorstand hemmer nur ei Veränderig: dä Tiziano Rondinelli isch als niiwä Kassier eistimmig gwählt wordä.

Am letztä Wuchäänd hemmer nu iises Gönnerfest durägfiährt. I dä Aula Cher hemmer iisi Gönner derfä kulinarisch und später ai nu musikalisch verwöhnä. Nach dä alljährlich Tombola mit 10 glücklichä Gwinner hemmer de bis am Morgä friäh d'After Party im Bäsägadä wiitergfiährt.

15. Februar 2024

Ez Isch d'Fasnacht 2024 bereits wieder Gschicht. In Erinnerigä schwelgä wärdid miär aber nu länger.

Am Schmudo am Morgä hemmer iis zum erstä Mail im niiwä Gwändli troffä. Ganz ungwohnt mit dä niiwä Farbä hemmer iis parat gmacht. Gmiätlich simmer de richtig Hotel Kronä gluffä, wo miär dussä es Ständli gspielt hend. De hemmer derfä dinnä go brunchä und numal eis zwei Liädli spielä. Da dä Ziitplan straff gsi isch, hemmer de ab miässä zum Fotoshooting wo miär immer mottogrecht gstaltit. Das Jahr hemmer derfä bim Holzbuitechnik Burch go fotelä. Aschliässend simmer de mitem Car uf Stans. Dert simmer dä grossi (und langi) Umzug gluffä. Nachher hemmer nu zwei mal derfä iises Beschtä zeigä, bevor miär mitem Car wieder uf Obwaldä sind.

Am Fasnachtsfritig simmer uf Sponsorätour gsi. Wiä all Jahr wemmer iis fiir diä Unterstützig bi dä Gönner und Sponsorä bedankä und hend derfä mehreri Ständli spielä. Am Abig simmer de a legendäri Mattliball uf Sachslä. S'Monsterkonzert hed scho ganz viel Fasnachtsbegeisterti ufä Dorfplatz glockt. Und ai nachher ufem Festgländ heds ganz viel Liit gha. Iisä Uiftritt hemmer de im Zelt derfä ha, d Stimmig uf und ai vor dä Bühni isch grandios gsi. So grandios, dass miär gar nimmä hend wellä uifherä spielä. 

Dä Tag nachem Mattliball isch bi vielnä zäch gsi, will de eint oder ander doch länger z'Sachslä bliebä isch und nah nu s'Zmorgä im Zumstei hed wellä gniässä. Wo de alli startklar gsi sind, simmer mitem Car i Länderpark uf Stans wo miär dinnä und dussä hend derfä d'Fasnachtsstimmig is Ichaifscenter bringä. Aschliessend simmer wiiter uf Beggäriäd. Dä Umzug vom See zum Schitzähuis isch churz aber steil gsi und miär sind froh gsi, sind anderi Liit voruis gluffä. I dä Kaffeestubä hemmer de grad es paar Tisch i Beschlag gnu und hend ordäli Cheli und Holunderwii trunkä. Später hemmer de nu derfä s'Schitzähuis iheitzä mit iisem Sound. 

Am Fasnachtssunntig isch de bereits diä letzti Carfahrt vo dä Fasnacht ufem Programm gstandä. In Eibu (Inwil) hemmer bi scheenstem Wätter am Umzug teilgnu. Bereits am 6i hemmer de dä Uiftritt i dä Turnhallä gha. Und da sind sich alli in Eibu einig gsi: miär hend ordäli Stimmig i diä sitzend Gsellschaft bracht. Sonä Applais hemmer nu sältä becho. Sogar äs Rundi fiir diä ganzi Guggä isch iis nachher vomnä Bsuächer offeriärt wordä. 

S'Programm vom Mäntig isch immer klar: FÄTZIGÄ MÄNTIG. Gmeinsam mit dä Dossäbängäler und dä Sarner Gugger hemmer d Lälli Zunft ufem Weg vom Obwaldner Hof zur Residenz Am Schärmä begleitet. Dert hemmer de im Innähof iisi gmeinsamä Liäder gspielt und sind nachher zum Sandwichässä igladä wordä. Im Aschluss simmer zrugg ufä Dorfplatz und hend mit dä Uifbuiarbetä vom Fätzigä Mäntig agfangä. Zum diä erstä Liit ufem Dorfplatz z'begriässä hend miär drii Guggä jewils äs Settli gspielt bevor dä Izug mit allnä Guggä los gangä isch. Nachher hed s'grossä Fäscht däDorfplatz ignuh. Bis i diä friähä Morgästundä hemmer gfästet.

Am Fasnachtszistig isch bereits alles wieder zum letztä Mal: s'letzä Mal s'Gwändli aleggä, s'letzä Mal Schminkä, s'letzä Mal parat machä, s'letzä Mal Umzug laifä, s'letzä Mal ufem Dorfplatz spielä. Nachem Umzug dur s'Dorf sind alli Fasnachtsbegeistertä numal ufä Dorfplatz und hend allnä Guggä zuäglost. Dä Dorfplatz isch rappelvoll gsi und so heds richtig Spass gmacht zum Spielä. Bevor de am Abig nu iisi legendäri Häx verbrennt wordä isch, hemmer iis derfä im Mex fiir diä tolli Zämäarbet bedankä. Nachher isch dä scheensti Programmpunkt dra gsi: d'Häxverbrennä. Fiir Ussästehendi isch es schwär z'begriffä was das fiir iis Bäsä bediitet, aber es isch immer ä würdigä Abschluss vonerä tollä Fasnacht. 

Am Äscherlimittwuch heissts de Putzä. Bevor s'Lokal putzt wordä isch, hed sich jedes Mitglied Deheimä mal richtig gwäschä, jedä Rest vo dä Fasnachtsschminki hinter dä Ohrä abgwäschä, d'Chleider id Wäsch griährt und diä eint oder anderä sind sicher vorem Schrank gstandä und hed sich gfragt, was sie jetzt sellid aleggä. :) Nachem Putzä simmer de wiä immer zämä go Znacht ässä und hend numal alli Gschichtä vo dä Fasnachtswuchä verzellt.

Miär mechtid iis bi allnä bedankä, wo i irgendeinerä Form zu därä tollä Fasnacht bitreit hend. Sigs als Mitglied, Oldie, Gönner, Sponsor, Schniederi, Fahrer, Elterä oder alles andere Möglichä. Miär sind unendlich dankbar fiir jedi Hilf.

5. Februar 2024

S'letztä Vorfasnachtsfest hemmer am Samstig am Seeguslerball gfiiret. Bevor miär aber uf Alpnach sind, hemmer derfä go Gönnerä bim Fanger Hair and More. Miär dankid am Guido und sim ganzä Team für diä jährlich Unterstützig. 

Nachem Gönnerä hemmer iis ufä Wäg uf Alpnach gmacht. Nachem Monsterkonzert simmer mitmnä feinä Znacht verwöhnt wordä, so wiä immer am Seeguslerball. Aschliässend hemmer de das grossartig dekoriärtä Festgländ erkundet, bevor miär hend derfä uf dä Bühni obä spielä. Vielä Dank liäbi Seegusler fiir das tollä Fest.

Jetzt wird s'altä Gwändli versorgt. Wo dui iis mitem niiwä Gwändli gfindisch, gsehsch unter "Agenda".

28. Januar 2024

Am Samstig simmer am Toxic in Ruswil bi dä Bielbachfäger gsi. Nid lang isch es gangä, bis miär iisä Platz a dä Bar und uf dä Tanzflächi gfundä hend und d'Stimmig immer besser wordä isch. Als Begleitig hemmer nu paar niiwi Gsichter gha, wo mal mit iis hend wellä go Bäsäluft schnupperä.

21. Januar 2024

Nachem Uiftakt vom letztä Samstig hemmer grad zwei Uiftritt a eim Wuchäänd ufem Plan gha. Am Fritig simmer vo dä Izipanizis ad Fasnachtseröffnig Sachslä mitem Motto Gwunderland igladä wordä. Miär hend derfä äs super organisiärts Fest gniässä. Nid wenigi vo iis sind bis zum Schluss umä gsi.

Am Samstig hemmer de nachem Izug nu zwei Uiftritt am ChäFer gha. Bi iisigä Temparatuirä simmer fascht uf dä Bühni igfrohrä. Zum Uiftaiä heds iis ad Bar zogä, somit ischs nid lang gangä bis miär iis wieder warm tanzet hend.

UIFTAKT 2024

8. Januar 2024

Am Samstig hemmer derfä bi dä Bäusyräller in Amsteg is Fasnachtsjahr 2024 startä. Nachem Monsterkonzert hemmer als ersti Guggä derfä i dä Hallä spielä. Aschliessend hemmer s'Festgländ erkundet und sind wiä immer a dä Bar hangäbliebä. Vorem Heigah sind de alli nu bim Ässstand verbi und hend sich für d'Heifahrt gstärkt. 

27. November 2023

D'Novemberuiftritt sind bereits hinter iis. Am 11.11. simmer vo dä Städer-Schränzer a Schränzerball in Alpnach igladä gsi. Miär hend derfä s Monsterkonzert eröffnä. s'Festgländ isch am Motto Hogwarts grächt wordä und jedä hed sis Huis gfundä. So hemmer iisä ersti Uiftritt i därä Saison uf d'Bühni zaiberet.

Am 25.11. hemmer de bi dä Sarner Gugger ihres 70-Jährigä Jubiläum gfiiret. Miär hend direkt nach dä Dossäbängäler derfä uf d'Bühni und drum hemmer zerst nu iises gmeinsamä Liäd gspielt. Zu Ehrä vo dä Sarner Gugger hemmer denn ai nu ä super Uiftritt abglieferet und iises Gschänk uberbracht. Aschliessend hemmer das Jubiläum nu richtig gfiiret.

Jetzt gads a diä letztä Fiinschliif bevor miär abem 6.1. richtig id Vorfasnacht startid.

4. Juni 2023

Gester hed iises Gönnerfest stattgfundä. Miär hend iis bi dä Gönner für ihri Unterstützig während dä Fasnacht 2023 chennä bedankä. Wiä all Jahr hend sich iisi Gönner derfä kulinarisch lah verwöhnä. S Chuchiteam hed es feins Rindsstroganoff mit Spätzli ufä Täller zaiberet, das isch de vo dä Mitglieder serviärt wordä. Zum Dessert heds sälbergmachti Cremä, Turtä, Tiramisus und Chiächä gäh. Da hed jedä chennä zuäschlah. Bi dä jährlich Tombola sind alli mit offnä Ohrä debiä gsi, hoffentlich wird s eigetä Los zogä. 10 glücklichi Gönner hend derfä äs Gschänk mitheinäh. Ganz am Schluss hemmer de nu es paar Liäder gspielt und zeigt, dass miär ai im Summer chend d Fasnacht ufd Bühni holä.

1. Mai 2023

Am letztä Samstig hemmer iisi GV im Bäsägadä durgfiährt. Nachem Rückblick vo dä letztä Fasnacht dur iisä Präsident Michi und em Major Kusi hed dä André s Wort ergriffä und dä Kassäbricht präsentiärt. Uf diä GV hend paar Mitglieder ihrä Uistritt bekannt gäh. Miär bedankid iis härzlich bi ihnä für diä ganz Arbet wo sie gleistet hend.

Dä Vorstand hed sich eistimmig lah wiederwählä lah. Das zeigt s Vertruiä, wo dä Verein i Rätschbäsärat hed.

Am Schluss hemmer nu äs niiws Ehrämitglied derfä ernennä. Dä Roger Krummenacher hed sich dur sini vielä mit Härzbluät investiärtä Stundä und sis Mitwirkä im Verein dä Titel Ehräfäger erarbeitet. DANKÄ Roger, dass miär immer hend chennä uf dich zählä i dä letztä 12 Jahr.

16. März 2023

Da Schmudo 2023 isch bereits ä Monet här und trotzdem gfindet meh diä letztä Konfetti immer nu uf dä Strassä. Miär hend d Fasnacht 2023 wieder mal richtig derfä gniässä und hend unvergässlichi Erinnerigä gsammlet.

Miär mechtid Dankä sägä. Dankä a allnä, wo iis durs ganzä Vereinsjahr irgendwiä unterstitz hend. 

Möchtisch ai dui Teil vom därä Familiä wärdä? De meld dich doch bim Kusi unter major@raetschbaesae.ch

12. Februar 2023

Letztä Samstig hemmer iises letztä Vorfasnachtsfest bsuächt.

Nachdem miär dä UIFTAKT erfolgriich durägfiährt hend, hemmer am druiffolgendä Samstig in Bristä UR bi dä Düä Bäbä iises Bestä uf dä Bühni und a dä Bar derfä zeigä. D Uiftrittsziitä sind uisgloset wordä und s Losglück isch leider nid uf iiserä Siitä gsi. Am Morgä am 1 hemmer als letzti Guggä derfä s Publikum iheizä. 

Am Samstig, 21. Januar sind miär vo dä Chieferschüttler uf Giswil igladä wordä. Ai det hemmer ä spatä Uiftritt gha, aber das macht iis Niid uis. Mit viel Motivation hemmer derfä z Giswil iises Beschti zeigä. Dankä a dänä Liit wo trotz därä extremä Chälti dussä zuäglost hend.

Am 28. Januar simmer de in Schübelbach gsi. Mit zwei Uiftritt hemmer chennä zeigä, was miär 2.5 Wuchä vor dä Fasnacht chennd. Ab denn hemmer gwisst, dass miär parat sind für d'Fasnachstwuchä.

Am Dossäbängälerball in Kägiswil hemmer denn bereits derfä am Chindernamitag uifträttä und dänä begeistertä Chinderaigä entgägä luägä. Zämä mit dä Sarner Gugger und dä Dossäbängäler hemmer iises gmeinsamä niiwä Liäd "Have a nice Day" gspielt, bevor miär de am Monsterkonzert und am Uiftritt wiiteri Liäder am Publikum präsentiärt hend. 

Z Hergiswil LU simmer denn zum Guggebattle gäg d Flohgugger us Nebikon igladä wordä. Es hed usinnig Spass gmacht. Aschliessend simmer de gmeinsam ad Bar und hend numal ordentlich uf diä Vorfasnacht agstossä.

Jetzt simmer parat für d Fasnachtswuchä. Da gfindid iär iis:

14. November 2022

Am vergangenä Samstig hemmer iisä ersti Uiftritt i därä Vorfasnacht gha. D Greubiheuscher Schachen hend iis zu dä Fasnachtseröffnig igladed. Mit grosser Vorfreud hemmer iis ufä Wäg nach Schachä gmacht und hend ä super Uiftritt ufd Bühni gleit. 

Jetzt probid miär für dä Rest vom Jahr numal intensiv, lehrid diä niiwä Liäder uswändig und bastlid fürs niiwä Motto.

25. Oktober 2022

Am letztä Wuchäänd hemmer iises Probeweekend im Sportcamp im Melchtal gha. Miär hend viel probt, glachet, agstossä und iis dä Chopf über diä niiwä Liäder zerbrochä. Am Samstig Abig hemmer nach dä Taifi vo dä Niiwmitglieder nu ä Mottoparty gha. Das Jahr isch s'Motto "Bad Taste" gsi.

Miär freiid iis uf iisä ersti Uiftritt am 12. November in Schachä.

11. Oktober 2022

Imenä Monet isch dä 11.11. und d Fasnacht stad vor dä Türä. Damit miär bis denn parat sind, simmer bereits fliessig am Probä, am Näihä und Bastlä, am Organisiärä vo iisnä Fäster und vo dä Fasnacht allgemein. Alli Mitglieder investierid bereits vieli Stundä i diä 5. Jahresziit.

10. Oktober 2022

Am Samstig simmer mit vielnä Mitglieder am Oktoberfest in Sarnä gsi. Miär hend das guät organisiärtä Fest chönnä gniessä und hend zämä iisä Spass gha. Dankä a dä Organisatorä.

3. Mai 2022

Am letztä Samstig hemmer am Unihockey-Plauschturnier vo dä Powerwave Buochs teilgnu. Mit viel Spass und sportlicher Leistig hemmer dä Izug is Viertelfinal gschafft wo miär de aber gäg d Ribi-Häxä leider uisgschiedä sind. (Vielleicht muäss nu erwähnt wärdä, dass alli Guggä i Viertelfinal izogä sind (-; )

24. April 2022

Am gestrigä Samstig hemmer iisi Generalversammlig abghaltä. Miär hend gmeinsam s Vereinsjahr 2021/22 abgschlossä und voller Hoffnig uf äs normals 2022/23 gstartet.

Uf diä GV hend iis 4 Mitglieder verlah. Miär dankid ihnä für diä Jahr i dem Verein und diä vielä Stundä wo sie i diversä Ämtli gschaffet hed. Miär freiid iis jetzt scho, alli bi dä Uiftritt vor dä Bühni z'gseh.

Zudem hemmer nu derfä zwei niiwi Ehräfäger ernännä. Mit ihrer Liedäschaft zur Fasnacht, ihrer Arbet wo sie immer leistit, dä konstanti Bereitschaft und Treui zu dä Rätschbäsä hend sie dä kompletti Verein überzügt, dass ä Ehrämitgliedschaft s'einzig Richtigi isch. Miär dankid am Kusi Krummenacher und am Adrian von Moos (besser bekannt als Zofä) für alles wo sie gmacht hend, machid und nu wiiterhin wärdid machä.

D' Fasnacht 2022 isch trotz dä schwierigä Umständ, vielnä Absagä und Verschiäbigä, fordernder Spontanität und intensivä Planig wieder ä tolli, erinnerigsriichi und unvergässlichi Wuchä voll mit Lidäschaft zur Fasnacht ai scho wieder Gschicht.

Miär mechtid iis bedankä bi iisnä Mitglieder, allnä Hälfer, Oldies, Festorganisatorä, dä anderä Guggänä vo Obwaldä und allnä Personä wo uf irgendei Art dezuä bitreit hend, dass d Fasnacht 2022 cha stattfindä. Ohni dä Isatz und diä gopferti Ziit vo allnä Beteiligtä wär das nid möglich gsi. Miär hoffid, dass d Fasnacht 2023 wieder so cha stattfindä wiä miär sie vor dä Pandemie kennt hend.

Härzlich Willkommä uf dä frischä Homepage vo dä Rätschbäsä Sarnä